Празниците се секогаш можност да се видиме со семејството, пријателите.

Секоја средба, празнување значи и полна трпеза. Разновидноста е голема, како и количината. Некогаш дури пред да започне прославата со самата дегустација на подготвената храна внесуваме многу повеќе калории од што ни е потребно, вели Везире Старова, магистер по нутриционизам и сертифициран дијабетес едукатор за индивидуалното планирање на исхраната кај лицата со дијабетес.

Исхраната на лицата со дијабетес не е посебна, туку е здрава исхрана. Затоа, за да ја поминете ноќта во пријатна атмосфера треба да се погрижите и храната да биде избалансирана и соодветна според планираниот дочек. Од големо значење е почестото мерење на гликемија во крвта од вообичаено, токму поради продолжениот начин на внесување на храна додека се слави.

Корисни предлози за оние кои ќе ја дочекаат Новата година дома

Направете избор на храна што ќе направи да се чувствувате добро, но не седнувајте на трпезата премногу гладни. Протеинитеи сложените јаглехидрати ќе ви помогнат да не прегладнете. На пимер тенко исечено козјо сирење и гриcини од интегрално брашно, или диетални крекери од наут богати со растителни влакна, чипс од леќа хумус и морков или јаткасти плодови, но не повеќе од 10 се одличен избор за мезе.

Секоја култура има свои карактеристични навики за храна во време на празници, а нашата се одликува со неколку јадења без кои празниците не би биле вистински празници доколку не се дел од трпезата, како што се руската салата, кифлички, сарма, печено месо и секако слатки. Затоа, направете еден убав баланс. Вечерата започнете ја со свежа салата зачинета со маслиново масло Пример салата со зеленчук како што се марула, краставица, морков, пиперка, карфиол, стебленце целер, брокула.

Доколку направите салата која се зачинува со сос, направете свој сос наместо да купите. Сосот може да биде со кисело млеко или јогурт, урда, суво нане, мајчина душица и црвен пипер.

Како главно јадење, мисиркиното месо е добар избор. Јаглехидратите внесете ги после салатата и месото, за да не дојде до голем пораст на глукоза во крвта.

Совет: доколку јадете сарма, избегнете ги кифличките. Ако се одлучите за кифлички, нека бидат од интегрално брашно.

За оние што не можат без руска салата, има здрава варијанта без салама, мало парче кашкавал, наместо две цели јајца – две белки една жолчка, повеќе грашок, помалку компир. Салатата да биде без големи количини индустриски мајонез. Само една лажица мајонез има 90 калории и 10 гр масти. Иако мајонезот не содржи јаглехидрати, сепак мајонез купен во продавница има додадени шеќери, пример во 1 лажица ниско маслен мајонез има 49 калории, 4.9 гр масти и 1 гр јаглехидрати. Се препорачува да се направи домашен мајонез со 2 жолчки од органски јајца со ¾ чаша маслиново масло и масло од авокадо. Додадете сок од лимон и малку сол за добар вкус.

Доколку некој друг ја подготви трпезата, едноставно треба да знаете да кажете НЕ, или да внесете многу мала количина од храна која вообичаено ја избегнувате.

Како новогодишен десерт изберете нешто лесно и овошно, десерт од тиква со ореви, печени круши или јаболка со орев, брауни од наут. Доколку сами ја подготвувате трпезата, одлучете се за колачи со овесни снегулки , бадемово млеко и банана, десерт од јагоди, јаболко и овес,чоколаден крем од авокадо, банана и какао.

Бидете внимателни во изборот на јаткасти плодови. Изберете мала чинија за себе за да контролирате колку ќе изедете, на пример; 5 лешници, 5 бадеми, 5 парчиња ореви, 5 ф’стаци, 10 суви боровинки, 3-4 сливи кои ќе ви бидат грицки кои ќе ги консумирајте во текот на целата ноќ на славење.

Доколку јадете во ресторан

Оние кои се одлучиле да ја поминат новогодишната ноќ во ресторан се препорачува однапред да го погледнат менито, за да ги знаат алтернативите и да одлучат што да одберат. Со оглед на тоа што повеќето предјадења обично се пржени, тие треба да се прескокнат и да се почне со свежа салата и потоа со главното јадење. По соодветно би било да се земе десертот по оброкот.

Препорачувам да се држите подалеку од рестораните кои нудат „неограничени предјадења и пијалоци“, бидејќи во овој случај можно е да ја изгубите контролата.

Забава со отворено бифе

Ако одите на забава со отворено бифе, погрижете се да не останете гладни, бидејќи малите закуски што се нудат може да бидат полни со калории и можеби нема да можете да им кажете не.

Обично овој тип на дочек не нуди главно јадење. Затоа доколку се одлучите за овој тип на дочек, многу е важно да јадете нешто здраво пред да излезете од дома. Во изборот кој е понуден со отворено бифе, најважно е да изберете чинија исполнета со разновидни овошја или зеленчуци.

Ограничете го алкохолот

Сте слушнале дека 1 грам алкохол има 7 калории? За споредба 1 грам јаглехидрати и протеини имаат 4 калории.1 грам масти се 9 калории.

Лицата со дијабетес треба особено да бидат претпазливи со внесот на алкохол, кој може да предизвика хипогликемија (намалување на глукоза во крвта) или хипергликемија(покачување на глукоза во крвта). Алкохолот може да го намали нивото на глукоза во крвта или обратно. На пример, пивото или слаткото вино кои содржат јаглехидрати може да доведат до покачување на глукоза во крвта.

При избор на алкохол треба да знаеме колку јаглехидрати и калориии содржи алкохолот.

Неколку кратки совети

• Не пијте повеќе од 2 чаши алкохол.

• Не пијте алкохол кога сте гладни.

• Пијте алкохол со вода.

• Чаша вино е многу подобра опција од водка, виски, мартини, ракија, рум или мешан алкохол.

• Ако вашиот пијалоке коктел, некоја алкохолна мешавина, може да содржи дури 400-600 калории.

Доколку сте испиле повеќе отколку што сте очекувале, следниот ден; подгответе чај од билки (камилица, жалфија, анасон, маточина) со 1 парче лимон кое ќе го смири вашиот стомак и ќе ви помогне да се чувствувате подобро. Или подгответе вода за детоксикација направена со килограм краставица и сок од 1 лимон, кое ќе го пиете цел ден.

Следете ја вашата активност

Запомнете дека танцувањето се смета за вежбање! Мерете ја гликемијата почесто од вообичаено.

Празниците обично ги очекуваме цела година. Фокусирајте се на пријателите и забавата, наместо на оброците!

Дочекајте ја Новата година со полно здравје и среќа!